謝寧接受新城廣播《Ben同Benson「chur」到行》錄音訪問
選完港姐難抵壓力致抑鬱 最怕被當動物咁睇
嘆與岑建勳是「父親式婚姻」 大爆主動結識現任丈夫經過
轉載自:
Star.Starphoto、Jolly的今日星蹤, 查看全部相片請前往:
http://starphoto.joinbbs.net/viewthread.php?tid=53661
https://jollyc.blogspot.com
（香港 – 2025年7月3日）1985年香港小姐冠軍謝寧，日前到新城廣播接受李有毅（Ben）和兒子李國煒（Benson）主持的《Ben同Benson「chur」到行》錄音訪問，謝寧當年參選香港小姐，Ben亦剛加入《香港早晨》擔任主持，並訪問過對方，謝寧笑言：「都成40年前，所以超過50歲嘅朋友先認得我。」
謝寧參選港姐前，曾在一間音樂學校教琴，然而當時她對人生感到迷茫，於是決定參選香港小姐，最後順利奪得冠軍。Ben憶述當晚的問答環節，謝寧給出的答案令人印象深刻，Benson即場問多次當晚的問題：「謝寧小姐，依家有一個病叫做愛滋病，大家都知道係唔好嘅病，如果畀你一個機會將愛滋病改一個名，你會改咩名呢？」謝寧回答：「我會改一個恐嚇性嘅名，叫game over，即係玩完喇，你唔驚呀？」後來外界對她的回答反應熱烈，令她始料不及。
不過謝寧亦爆料，指大會事前曾給她們35條題目，然後所有女生便圍在一起想答案，她表示：「唔係我叻，只能夠講我好好運，揀咗條好有趣嘅問題，同埋好有趣嘅答案，但個答案係邊個改，我就唔知喇，因為係30幾個女仔一齊諗嘅。」
雖然謝寧當選後人氣急升，但她坦言當時心情十分低落，「我發覺我唔可以承受咁大壓力，我唔係一個幕前嘅人，身高又唔係高，啲人覺得我係香港小姐最矮一個，自己唔識得處理外間對我嘅評價，我就好封閉自己，好唔開心，然後我覺得我係有抑鬱。」謝寧續指：「我唔鍾意畀人指指點點，一夜之間每個人都識得自己，嗰種感覺好唔舒服，好似睇動物咁睇你，有啲人荒死人哋唔識你，會好享受，但我唔鍾意，我好怕人哋識得我，到依家都有呢種感覺，可能個人自信心唔夠，或者太細個，所以嗰一年我覺得好慘。」
直至踏入人生第二個階段，Ben形容當時外界得知謝寧與岑建勳拍拖都大吃一驚，謝寧笑稱：「絕對係美女與野獸！」她透露二人拍拖是跟信仰有關，因自己期望要有一位基督徒男友和丈夫，於是帶對方返教會，「點知佢真係決志，咁我咪覺得係佢喇！」然而，兩人因性格不合，於2005年結束結婚14年婚姻，「佢係一個好成熟、好老積嘅人，佢係一個大人，我係小朋友，我哋有好大段距離，我唔可以有一個父親式婚姻，好似我咩都要聽佢講，我冇自己諗法，我要生活喺佢陰影下，我冇咗自己；其實佢冇變，變嘅係我。」
離婚後，謝寧在教會遇上現任丈夫王德偉，「當時我唔識佢，只係覺得佢好靚仔，有一次我同朋友講起呢件事，佢話同我一齊返教會，睇吓撞唔撞到呢個人，點知一泊低架車，擰轉身就見到佢，我好無恥上去同佢講『我覺得你好熟面口，我唔想排隊，可唔可以打尖呀』，佢話隨便啦，跟住一齊排隊入教會。」之後眾人互相介紹，原來男方是TVB的舊同事，更曾為謝寧拍照，謝寧表示：「然後我就諗點樣攞佢電話，咁啱就嚟中秋節，我要幫曲奇店影中秋節產品，我就搵佢做freelance，咁就交換咗電話；喺做嘢過程去了解呢個人，覺得佢好單純同溫柔，發覺佢好啱我，就開始拍拖，經歷十堂婚姻輔導就步入婚姻，好開心。」Ben看到謝寧春風滿臉的樣子即笑言：「嘩，見到你雙眼閃閃發光，好甜蜜。」
詳細節目內容，請留意7月7日，晚上11時–凌晨1時，新城知訊台《Ben同Benson『Chur』到行》，網址：https://www.metroradio.com.hk/MetroInfo/
謝寧、曾醒明、社企黃明慧接受新城《開心大派對》訪問
辦曲奇慈善活動
集400人製作巨型視障人士點字曲奇
轉載自:
Star.Starphoto、Jolly的今日星蹤, 查看全部相片請前往:
http://starphoto.joinbbs.net/viewthread.php?tid=52779
https://jollyc.blogspot.com
(香港– 2024年10月26日) 前港姐謝寧日前與社企「Codekey Cookies」的曲奇品牌創辦人黃明慧（花花）及前無綫公關部負責人曾醒明，到新城廣播接受薛家燕、范振鋒及思敏主持的《開心大派對》訪問，宣傳下月2日假荃灣舉行的《「點連多元•世界紀錄」暨慈商社市集》慈善活動，屆時會有逾400人集體製作巨型點字曲奇，齊創世界紀錄。
謝寧和花花相識多年，兩人同樣熱心公益，在這次慈善活動中擔任技術總監的謝寧，笑言是花花太過抬舉自己，「真係不敢當，花花嘅企業都做咗十年，雖然佢係視障人士，但佢上山下海，又爬山又潛水，仲會自己做曲奇同月餅，好似正常人一樣，我佩服到不得了，同埋佢喺加拿大完成咗大學心理學系課程，依家幫人做埋心理輔導，好有才華，今次佢一call我話有呢個活動，我即刻舉腳贊成。」
家燕姐問曲奇餅上的點字是甚麼？黃明慧解釋是視障人士專用的點字，「大家成日都會見到，例如電梯入面見到嘅一點點，就係盲人摸嘅點字，至於點字曲奇係我哋首創，每塊曲奇都有點字，亦都有唔同意思喺裡面，有師傅曾經問我，『點解你咁有創意，鍾意做牌九曲奇』，哈哈！」花花又透露這次慈善活動，會有400多人在超過1600塊曲奇上面寫點字，「我哋會寫代表英文字LOVE，一齊做一塊大心形曲奇，希望可以破世界紀錄。」而是次活動籌得善款，將會幫助視障、聽障、智障、少數族裔及長者等等，極具意義。
家燕姐欣賞曾醒明文筆每年生日特刊係曾生執筆
至於曾醒明成立的義工團體莒光文化服務基金，亦有份參與是次慈善活動，「我同謝寧識咗好多年，我第二屆港姐開始跟，謝寧係第十三屆港姐冠軍，大家都好鍾意做善事。」家燕姐指傳媒十分相信曾醒明，而電視台多次面臨的公關危機，亦都靠他才得以解救，家燕姐還爆料，「曾生嘅文筆好掂，我每年生日出特刊，講嚟講去都講唔到重點，話畀曾生知，佢幾句就講晒我內心世界，真係好嘢！」
聽完家燕姐所講後，曾醒明表示要講個秘密給大家知，「每年香港小姐冠軍farewell嗰個講詞都係我寫，『喺過去一年….』，之後繞台一周，真係幫佢哋度身而寫，如果佢哋有為香港小姐或者電視台爭光，更加要特別發揚光大。」
詳細節目內容，請留意10月26日，3-4時，新城知訊台《QK玉瑛室》節目，網址：https://www.metroradio.com.hk/MetroInfo/
