一個好MAN 一個驚青 潮爆特警孖咇出更！

一個好MAN  一個驚青  潮爆特警孖咇出更！

 

 

型仔黃宗澤（Bosco）又要孖住「巴打」出動喇！不過今次唔係警犬「巴打」，而係「哎吔巴打」金剛。Bosco同金剛分別喺《刑警兄弟》中飾演一對異姓兄弟，一個係好man嘅爛仔差人陳見飛，成日橫衝直撞，有破壞冇建設；另一個係做事井井有條，但唔願冒險查案嘅驚青戇警Johnny。兩人同屬一警局，在公被上司編排成一組互相監視，在私又因彼此父母結婚要住喺同一屋簷下，爲爭寵爭功爭廁所，一家人爆出連場衝突同笑話，包你由office笑到返屋企！

 

有「獎老」金剛，又點可以冇「獎門人」曾志偉？不過今次獎門人係陳見飛嘅直屬上司，係一個作風官僚嘅老油條，不求有功，只求無過，同Bosco喺戲中爆出唔少火花。此外，曾志偉亦親任監製，搵嚟《賤精先生》、《2013我愛HK恭囍發財》等賣座港產笑片編劇戚家基自編自導，仲搵嚟身材fit到漏油嘅「蜘蛛女」鄭麗莎大展武功，再加上一眾香港黃金配角傾力助陣，將警匪追逐嘅驚險刺激、現代愛情嘅浪漫、港式喜劇嘅無厘頭共冶一爐，開行火力狂點觀眾笑穴！

 

當然，徐子珊同方皓玟兩位女主角分別飾演嘅日系小公主同黑幫千金亦相當抵死！一個打扮kawaii，但個樣好ugly；另一個刁蠻任性，愛得轟烈。真係要問聲法官大人，呢pair港女究竟係點樣冧掂一對哎吔巴打㗎呢？強勁卡士仲有「幽默祖師」馮淬帆、「配角天后」金燕玲、余安安、林家棟、陳小春、盧海鵬、林盛斌、陳煒、湯盈盈……據聞人紅聲靚嘅「坤哥」吳業坤亦罕有現身大銀幕，飾演壓力爆煲嘅真‧毒男！

 

破奇案 嗒港女 哎吔巴打原來係絕配？

兩個來自單親家庭嘅阿Sir陳見飛（黃宗澤 飾）同Johnny（金剛 飾）性格迥異，一個爛仔咁款，一個單純裙腳，成日火星撞地球。偏偏彼此嘅父母相戀，鬥氣冤家頓成哎吔巴打，仲住喺同一屋簷下，爆出大堆笑話。義氣仔阿飛懷疑前度Bessie（方皓玟 飾）嘅老闆害死好兄弟，於是著佢暗中查探，卻隨即引來追殺，更牽連家人；戇直嘅Johnny亦睇唔過眼，為咗搜集罪證換取情報，不惜同醜樣但嗅覺極靈嘅毒品調查科小公主（徐子珊 飾）談情說愛。惡勢力當前，異姓兄弟終於放低成見，拍住上爲正義展開驚天一戰！

 

 

主要演員及人物介紹

1    陳見飛 (爛仔差人)   

黃宗澤

     陳見飛，爛仔差人，嫉惡如仇，一切義字行先，為手足兩脇插刀在所不辭，卻不經大腦，橫衝直撞，有破壞沒建設。外表雖冷酷，但其實本性頑皮，以作弄哎吔弟弟Johnny為樂，對愛情更是口硬心軟，鐵漢柔情。

 

2    李仲尼 Johnny (戇男警察)   

金剛

     Johnny，帶台灣口音的紙板警察，樂於打文件而不願冒險查案，自幼被母親寵愛，形成單純裙腳性格，事事井井有條，是長輩上司眼中的乖孩子。直至跟哎吔大哥陳見飛相處後，才真正成長，成為男子漢！

 

3    陳菲力 Philip Chan (回春老豆)   

馮淬帆

     Philip Chan，退休神探，自喪妻後與兒子陳見飛相依為命，話不多但句句坦白直率，雖尖酸刻薄，總不失是個好父親，不過有時赤裸裸的真心話，不免令新相識的哎吔兒子Johnny感到尷尬...

 

4    嬌姐 (風騷阿媽)   

金燕玲

     嬌姐，風騷台灣徐娘，與丈夫異離後，便將所有的愛都放在兒子Johnny身上，事無大小也替他作主，如溫室小花。一次旅遊，與Philip Chan相逢恨晚，回港閃婚，才把二人南轅北轍的兒子拉上兄弟關係。

 

5    Bessie (黑幫千金)   

方皓玟

     Bessie，綽號死亡低調，黑幫老大的獨生女，被縱得刁蠻任性，有嚴重自殺及傷人傾向，每次都愛得徹底卻敗得轟烈。其實對男友陳見飛喜怒無常、監管森嚴，只因欠缺安全感，骨子裏只是一個渴望被愛的小女人。

 

6    哈日小公主   

徐子珊

     小公主，日本少女kawaii打扮，配上一副欠揍的表情，令所有男人都退避三舍，只好終日與流浪狗為伴。Johnny為了利用她比警犬還要靈敏的嗅覺，借故親近，成功打動寂寞芳心，才發現她是一個願意無條件付出的一等一好女友！

 

7    聞常開 (警界老爺)   

曾志偉

     聞常開，陳見飛的直屬上司，作風官僚的老油條，不求有功，只求無過，少做少錯，不做不錯，與衝動的陳見飛青面上水火不容，但實際上處處為陳見飛背黑鍋及處理事情。

 

8    劉晶 (江湖老散)   

陳小春

     陳見飛自小就認識的好友，雖然身為小混混，但與陳見飛依然如同手足兄弟。後來轉投孔祥興下工作，繼而引發一連串事件，令陳見飛與孔祥興勢成水火。

 

9    盧海 (社團揸FIT人)   

盧海鵬

     黑幫老大，Bessie的父親。能幹務實，雖然能打理得黑幫整整有條，郤對刁蠻任性的女兒毫無辦法。即使如此，依然十分寵愛女兒，為此更拉攏陳見飛轉為其下工作。

 

10    孔祥興 (土豪商人)   

林家棟

     孔祥興，表面上是正當商人、禁毒之星，實際是販毒頭子，心狠手辣，目中無人，小小事便燥狂至青筋暴現，為賺錢更可不擇手段！

 

11    Madam朱 (契媽警司)   

余安安

     Madam朱，警察“中央新部”的長官，Johnny的上司。為著破壞王陳見飛調職來到自己部門而傷腦筋，更下令Johnny隨時匯報陳見飛的行動，以免被陳見飛破壞這片樂土。

 

12    抽水Sir

林盛斌

     抽水Sir，陳見飛的上司，一個面面俱圓、做事滑頭既長官，專門為陳見飛出面去平息事情。對陳見飛所做的事情，只要不惹事生非，都“隻眼開隻眼閉”。

 

13    四眼仔 (爆煲大學生)   

吳業坤

     一名好色的宅男，因面對巨大的考試壓力而去偷拍女性裙底，但不幸因失誤而被即場人贓並獲。

 

14    女警 (諸事女警)   

湯盈盈

     警署“中央新部”的女警花，為人八掛，愛四處打聽消息及大事宣傳。女警花之首、警署裡的天文台。

 

15    女警 (靚女警花)   

陳煒

     警署“中央新部”的女警花之一。

 

 

上映日期： 4月21日

主演：黃宗澤、金剛、徐子珊、方皓玟

導演：戚家基

級別：IIB

片長：102 分鐘

片種：喜劇 │ 動作 │ 警匪