林海峰《是但噏 我好驚》澳門站

林海峰《是但噏 我好驚》澳門站
轉載自: Star.Starphoto、Jolly的今日星蹤
http://starphoto.joinbbs.net/viewthread.php?tid=569
http://starphoto.freebbs.tw/viewthread.php?tid=6886


林海峰《是但噏 我好驚》澳門站日前(3月17日)於澳門順利舉行，阿Jan當晚於台上再次表明拒絕太太彭羚復出，當晚表演更加入海外版環節，由阿葛大唱70年代大笪地流行曲，更與女舞蹈員大跳辣身舞。

林海峰《是但噏 我好驚》進行一連串巡迴演出後，日前於澳門威尼斯人金光綜藝館舉行最後一場表演。阿Jan一開始就將早前有傳太太彭羚「復出」一事詳細解釋，他說：「之前我太太做完兩場黃偉文演唱會之後呢，就有好多人同我講，叫我比佢復出。如果真係的話，咪即係叫我屋企兩個小朋友退學？到時彭羚就上台唱《小玩意》，我就喺屋企唱《垃圾》，仲有兩個披頭散髮嘅小朋友扮李惠敏唱《你沒有好結果》」。之後他續說：「啲人話聽返《小玩意》覺得係溫馨回憶，其實根本係一個慘痛經歷。即係邊有人會話『小姐，你個喪禮搞得幾好喎，等幾年我哋再搞過，拎返你啲骨灰出嚟燒啦』」。最後他又抵死地說：「其實唱得最多《小玩意》嘅並唔係彭羚，而係伊莉沙伯泰萊，佢結過咁多次婚，隻歌比佢唱到跳線咁滯啦」。

之後阿Jan請來好拍擋葛民輝接力演出連香港場都未有加入的海外專屬版「大笪地」環節。阿葛以一身唐裝打扮出現唱出《唐山大兄》，身旁更有一眾火辣舞蹈員伴舞。之後阿葛又唱出《十一哥》、《奀妹買菜》和《點解我鍾意你》等懷舊歌曲。之後阿Jan重返舞台，與阿葛一同合唱《死啦啲青春豆》，而一眾女舞蹈員則於台上脫去旗袍，以一身超低胸舞衣示人。

然後兩人又發揮搞笑本色，指大笪地環節「搭飛機去嗰啲埠先有」，又將樂隊成員走埠的笑料擺上舞台。之後阿Jan說：「去到馬來西亞雲頂最開心，因為我聽到有阿嬸講，自己去咗睇林峰演唱會，不過唔知點解林峰講嘢多過唱歌。然後又有個阿伯話，林峰演唱會個嘉賓係蓋鳴暉。我真係幻想唔到喇，做大戲咁點chok唧？」到結尾時段，阿Jan又對阿葛說：「一陣完騷點返香港呀？坐遊艇呀？」而阿葛則抵死地回應說：「我會比返500蚊架喇」。最後兩人與特別嘉賓草蜢一同勁歌熱舞，先後唱出《開心鬼》、《獅子山下》等名曲，最後以《廣播道Fans殺人事件》結束整晚表演。