賴彥妤成為譚詠麟《蝶戀花》MV 女主角隔空談情

 
賴彥妤成為譚詠麟《蝶戀花》MV 女主角隔空談情
生日無得飛 留港佈置泰國度假村慶生
轉載自: Star.Starphoto、Jolly的今日星蹤, 查看全部相片請前往:
http://starphoto.joinbbs.net/viewthread.php?tid=49232
https://jollyc.blogspot.com
 
 
     曾參選香港小姐的TVB女星兼主播賴彥妤(Vivienna)喺譚詠麟(校長)剛剛推出嘅新歌《蝶戀花》自導自演MV中被選中,升呢擔任女主角。以新髮型亮相嘅Vivienna表示導演要求要拍出80年代嘅感覺。所以要有黑髮文青嘅造型,就被安排戴上假髮演出。佢話由試造型開始,劇組同自己睇睇下就好快習慣咗,親民嘅校長仲讚Vivienna同個假髮造型融合咗,好似一路拍個頭髮會一路生長一樣。Vivienna話自己嘅爸爸同媽媽都係校長嘅忠實粉絲,所以細細個已經喺屋企成日聽到校長嘅歌:「完全無諗過自己可以係校長事隔多年推出嘅新歌MV出現,成為MV女主角。屋企人見到都覺得好興奮,仲不停Send比親戚同朋友叫佢哋Like。」佢仲話今次拍攝MV對自己嚟講都係一個新挑戰:「今次MV一嚟就係同校長隔空談情! 我演嘅女主角同校長係一對戀人。女主角多年前遇到意外離開,仍然痴情每日都去找對方,男女主角係唔同既時空相愛、互相等住大家。劇本故事淒美,深情演繹有挑戰性。入面有分三步曲,要瞬間由笑變喊,所以拍攝之前係屋企都密密對住鏡練習表情。」新歌《蝶戀花》改編咗周杰倫、費玉清嘅《千里之外》,個MV仲係校長嘅生日禮物。而啱啱過咗生日嘅Vivienna仲話同校長爭一日生日,認真有緣份:「我哋差一日生日,年份都應該差唔多,校長年年25歲呀嗎,哈哈……」佢仲話校長真係好親民同照顧後輩,拍攝MV當日仲有蛋糕食,一齊慶祝生日。」講到生日,好耐無飛嘅Vivienna話一直Plan咗好想去泰國Relax下,食下嘢做下Spa嚟個生日之旅。但因有工作在身又要計隔離時間,所以飛泰國之旅唯有告吹。一班好朋友知道就第一時間同佢喺香港三層獨立屋Villa佈置個泰國度假村Feel嘅生日派對等Vivienna可以感受泰國風情,又係池畔切蛋糕,一眾圈中圈外朋友齊齊慶賀。講到生日願望,早前已被安排入劇組初嚐拍劇嘅佢希望陸續可以拍多啲唔同類別嘅電視劇,可以遇上好角色成功「入屋」,繼續有唔同新工作新挑戰。