朱晨麗拍《大醬園》驚現特異功能……劈柴高手
接獲《法證先鋒IV》重拍通知擔心身體頂唔順
轉載自: Star.Starphoto、Jolly的今日星蹤, 查看全部相片請前往:
(2019年5月15日) 無綫花旦朱晨麗(朱朱)
正忙於拍攝民初新劇《大醬園》，唔好睇佢斯斯文文，講嘢陰聲細聲，原來佢好劈得，劈柴功夫快夾準，就連猛男韋家雄都甘拜下風。
劇中朱朱為生活每日要好勤力咁踩三輪車送貨，仲要劈柴，點知朱朱一埋位，三扒兩撥就將柴劈開，全劇組都睇到目瞪口呆，朱朱得戚說：「連韋家雄都劈唔到呀，道具手足見韋家雄劈極都劈唔開條柴，就同佢講『叫Morning朱幫你劈啦，佢好叻』，唔知點解劈柴對我嚟講，好似有特異功能咁，一Take過，好勁呀！」過幾日之後，韋家雄又要再劈柴，他繼續劈唔開，在場工作人員笑言叫韋家雄搵朱朱做替「手」幫他拍劈柴鏡頭。
朱朱在《大醬園》中擔正女主角，每日都要開工，但早前她的經理人收到《法證先鋒IV》劇組通知，因為黃心穎被換角，朱朱的戲份都受到影響要重拍，她即將要面臨同時趕拍兩部劇集的噩耗，因為《大醬園》係民初劇，《法證》則是時裝，連同轉妝頭、造型、轉場及拍攝，朱朱即將要陷入日接夜，夜接日的瘋狂拍攝狀態。
朱朱愁晒說：「收到重拍消息後，心情即刻沉曬，我即刻問法證嗰邊，我有幾多場口要重拍？但嗰邊都未回覆到我。而大醬園講我一個女人打併撐起頭家，幾乎場場戲我都有份，如果兩邊一齊開，只得一、兩個鐘休息時間都要拍埋，到時要日接夜，夜接日，肯定冇得瞓覺，好擔心身體會負荷唔到，會頂唔順！依家唯有等公司去處理，等候發落，相信公司會有一個最適合的安排！」朱朱表示好多年冇試過放假，之前拍法證已經拍到五癆七傷，現時最希望拍攝順利完成，可以讓她休息一下，調養身體。
沒有留言:
發佈留言